Հակառակորդի վերահսկողության տակ գտնվող տարածքում հայտնված հայ պատանիների հարցով Կարմիր Խաչին դիմումներ չեն ներկայացվել

Ադրբեջանի տարածքում հայտնված երկու պատանիների հարցով Միջազգային Կարմիր Խաչի Կոմիտեին դիմումներ դեռ չեն ներկայացվել։ Այդ մասին «Սպուտնիկ Արմենիա»-ին ասել է Հայաստանում ԿԽՄԿ-ի հաղորդակցության ծրագրերի ղեկավար Զարա Ամատունին։

«Մեր ծառայությունները հասանելի են որպես չեզոք միջնորդ, սակայն այս պահին կարող ենք միայն նշել, որ հետևում ենք այս թեմայով հրապարակվող տեղեկատվությանը, և ներկայումս մեր կողմից լրացուցիչ տեղեկություն չկա», - ասել է Ամատունին։

Նրա խոսքով՝ կազմակերպությունը, իր լիազորությունների շրջանակներում, կարող է դիմել մյուս կողմին՝ օգտագործելով չեզոք միջնորդի իր հնարավորությունները՝ այդ անձանց իր տարածքում գտնվելու փաստի հաստատման համար։

Ամատունին հիշեցրել է Բաքվում Կարմիր Խաչի դիրքորոշման և ադրբեջանական կողմի գրասենյակը փակելու ցանկության մասին։ Այս առումով նա չի կարող վստահորեն ասել, որ կազմակերպության ներկայացուցիչները կարողացել են այցելել մյուս կողմում հայտնվածներին։