Ադրբեջանի գործողությունների ծանր հետևանքները․ Հայաստանի բնակիչները զրկվել են խմելու ջրից․ պատգամավոր
Ադրբեջանի ռազմական գործողությունների հետևանքով Հայաստանի մի շարք տարածքներում վնասվել են էկոհամակարգերը, այդ թվում՝ անտառները, իսկ որոշ բնակավայրերի բնակիչներ զրկվել են ոռոգման և խմելու ջրից։ COP17-ի շրջանակում անցկացված պանելային քննարկման ժամանակ այս մասին ասել է ՀՀ ԱԺ ֆինանսավարկային և բյուջետային հարցերի մշտական հանձնաժողովի նախագահ, «Ուժեղ Հայաստան» խմբակցության պատգամավոր Լիանա Մանուկյանը։
«Ցավով պետք է արձանագրել, որ կենսաբազմազանության հարցերը նաև բացասական համատեքստ են ստանում։ Հաճախ կենսաբազմազանության համակարգերն ու ռեսուրսները դառնում են հակամարտության թիրախ, ազդեցության լծակ կամ պատճառ ու նպատակ։ Դժբախտաբար, Հայաստանը բախվել է այս երեք դեպքերին էլ»,– հավելել է պատգամավորը։
Մանուկյանի պնդմամբ՝ արձանագրվել են բազմաթիվ դեպքեր, երբ Ադրբեջանի ռազմական գործողությունները հանգեցրել են կենսաբազմազանության և անտառածածկույթի կորստի ու դեգրադացիայի։ Նա օրինակ է բերել Արծվաբերդի անտառտնտեսությունը, Շիկահողի արգելոցը և Ջերմուկի անտառները։ Պատգամավորի պնդմամբ՝ այդ դեպքերից մի քանիսը փաստագրվել են ՀՀ պետական մարմինների կողմից, ինչպես նաև արբանյակային լուսանկարների միջոցով։
Նա անդրադարձել է նաև Հայաստանի ինքնիշխան տարածքների նկատմամբ Ադրբեջանի վերահսկողության հետևանքներին՝ նշելով, որ դրանք խնդիրներ են ստեղծել ոչ միայն բնապահպանության, այլև ջրային ռեսուրսների հասանելիության տեսանկյունից։
«Հայաստանը ոչ միայն զրկվել է կենսաբազմազանության պահպանման հնարավորությունից, այլև ՀՀ բնակիչները զրկվել են ոռոգման և խմելու ջրից»,– ընդգծել է Մանուկյանը՝ դա որակելով մարդու իրավունքների խախտում։
Պատգամավորը նաև հայտարարել է, որ Ադրբեջանի ղեկավարությունը շարունակում է ծավալապաշտական հռետորաբանությունը՝ թիրախավորելով Հայաստանի կարևորագույն էկոհամակարգերը, այդ թվում՝ Սևանա լիճը։
«Միջազգային հանրությունը պետք է հստակ քայլեր ձեռնարկի ոչ միայն կենսաբազմազանության պահպանման, այլև այն հակամարտությունների պատճառ, թիրախ կամ ազդեցության գործիք չդարձնելու ուղղությամբ»,– նշել է Մանուկյանը։
Հիշեցնենք, որ ՄԱԿ-ի Կենսաբանական բազմազանության մասին կոնվենցիայի կողմերի 17-րդ համաժողովը (COP17) կանցկացվի Երևանում 2026 թվականի հոկտեմբերի 19-30-ը։
