Արման Ծառուկյանի առաջիկա մրցակիցը հայտնի է

UFC-ի թեթև քաշային կարգի վարկանշային աղյուսակի առաջատար, Ռուսաստանը և Հայաստանը ներկայացնող Արման Ծառուկյանը որոշել է ժամանակավորապես օկտագոնը փոխարինել ըմբշամարտի գորգով։ 2026 թվականի հունվարի 10-ին Ֆլորիդա նահանգի Սանրայզ քաղաքում կայանալիք Real American Freestyle 5 մրցաշարի շրջանակում նա ազատ ոճի ըմբշամարտի կանոններով գոտեմարտ կանցկացնի ամերիկացի փորձառու մարզիկ Լենս Պալմերի հետ։

29-ամյա Ծառուկյանի համար սա հիանալի հնարավորություն է՝ ստուգելու ըմբշամարտի իր հմտությունները բարձրակարգ մրցակցի դեմ՝ նախքան խառը մենամարտերում սպասվող հնարավոր տիտղոսային մենամարտը։ Արմանն իր պրոֆեսիոնալ կարիերայում ունի 23 հաղթանակ, որոնց զգալի մասին հասել է հենց դոմինանտ ըմբշամարտի և պարտերում վերահսկողության շնորհիվ։

Ծառուկյանի մրցակիցը՝ 38-ամյա վետերան Լենս Պալմերը, ըմբշամարտի տպավորիչ կենսագրություն ունի։ Նա NCAA-ի առաջին դիվիզիոնի քառակի All-American մրցանակակիր է և PFL լիգայի կիսաթեթև քաշային կարգի կրկնակի չեմպիոն։ MMA-ի աշխարհում ամերիկացին վաստակել է ամենավտանգավոր գրեփլերներից մեկի համբավը՝ իր ակտիվում ունենալով 23 հաղթանակ։

RAF 5 մրցաշարը խոստանում է դառնալ մեծ իրադարձություն ըմբշամարտի աշխարհում․ այդ երեկո գորգ դուրս կգան նաև խառը մենամարտերի այնպիսի աստղեր, ինչպիսիք են Քոլբի Քովինգթոնը և Լյուկ Ռոքհոլդը։