Ցեղասպանության ցանցի ղեկավարը ելույթ է ունեցել դատարկ աթոռների առաջ. Էրդողանը՝ ՄԱԿ-ում Նեթանյահուի ելույթի մասին
- Lilit
- Sep 27
- 1 min read
Թուրքիայի նախագահ Ռեջեփ Թայիփ Էրդողանը, ելույթ ունենալով Bosphorus դիվանագիտական ֆորումում, մեկնաբանել է Իսրայելի վարչապետ Բենիամին Նեթանյահուի ՄԱԿ-ի Գլխավոր ասամբլեայում ունեցած ելույթը՝ հայտարարելով, որ «ցեղասպանության ցանցի ղեկավարը ելույթ է ունեցել դատարկ աթոռների առաջ», հաղորդում է Anadolu-ն։
«Նախօրեին ցեղասպանության ցանցի ղեկավարը չի կարողացել գտնել որևէ մեկին, որը լսեր իր ստերն ու սպառնալիքները ՄԱԿ-ի Գլխավոր ասամբլեայում, ուստի ելույթ է ունեցել դատարկ աթոռների առաջ»,- հայտարարել է Էրդողանը։
Նա հավելել է, որ Գազայի հատվածում «սովը անխոհեմորեն օգտագործվում է որպես զանգվածային ոչնչացման զենք»։
«Նեթանյահուն, նրա կաբինետը և ցեղասպանության ցանցը պետք է անհապաղ հանձնվեն արդարադատությանն ու պատժվեն»,- ասել է Թուրքիայի նախագահը։
Նա հայտարարել է, որ եթե Իսրայելը չկասեցվի, «պաղեստինյան պետություն ստեղծելու կամքը կմնա չիրականացված»։
Իսրայելի նկատմամբ պետք է կիրառվեն զսպող պատժամիջոցներ, ներառյալ՝ միջազգային մարզական մրցաշարերին մասնակցելու արգելք, հավելել է Թուրքիայի նախագահը։
