ՔՊ-ից ովքեր են ՌԴ «սև» ցուցակում. երկկողմանի արգելքներ. ArmLur
«Ժողովուրդ» օրաթերթն այսօր գրել էր, որՌուսաստանի Դաշնություն մուտք գործելու արգելքի է բախվել ԱԺ ՔՊ խմբակցության պատգամավոր, առողջապահության հարցերի մշտական հանձնաժողովի նախագահ Լուսինե Բադալյանը։ Նա պետք է պատվիրակության կազմում մեկներ Սանկտ Պետերբուրգ՝ մասնակցելու միջգերատեսչական համաժողովի, սակայն օդանավակայանում նրան տեղեկացրել են, որ իր մուտքը ՌԴ արգելված է։
Մինչ Լուսինե Բադալյանը հարկադրված է եղել մնալ Հայաստանում, պատվիրակության մյուս անդամներն արդեն մեկնել են Սանկտ Պետերբուրգ և մասնակցում են նախատեսված միջոցառմանը։
Ի՞նչն է պատճառը, որ ռուսական կողմը Հայաստանի իշխող ուժի ներկայացուցչին թույլ չի տվել մուտք գործել երկիր, և արդյոք սա քաղաքական հաշվեհարդարի հերթական դրսևորումն է։
«Օրաթերթի տեղեկություններով՝ այս պատմությունը պետք է դիտարկել նաև Հռոմի ստատուտի շուրջ հայ-ռուսական լարվածության համատեքստում։ Մեր աղբյուրների փոխանցմամբ՝ Ռուսաստանի Դաշնություն մուտք գործելու արգելքներ են կիրառվել նաև Հասմիկ Հակոբյանի, Ծովինար Վարդանյանի և Մարինա Ղազարյանի նկատմամբ։ Ըստ մեր տեղեկությունների՝ այս սահմանափակումները ևս կապված են Հռոմի ստատուտի վերաբերյալ նրանց հնչեցրած հայտարարությունների և այդ հարցում զբաղեցրած դիրքորոշման հետ։
Ստացվում է՝ ռուսական կողմի դժգոհությունը, մեր աղբյուրների փոխանցմամբ, չի սահմանափակվել միայն մեկ քաղաքական գործչով։ Մուտքի արգելքի են բախվել նաև այլ անձինք, որոնք Հռոմի ստատուտի շուրջ քննարկումների ժամանակ հանդես են եկել կոշտ հայտարարություններով։ Այս հանգամանքը հարց է առաջացնում՝ արդյոք Մոսկվան քաղաքական հայտարարությունների համար անցանկալի է համարում Հայաստանի իշխանական շրջանակների որոշ ներկայացուցիչների և նրանց նկատմամբ պատժիչ միջոցներ կիրառում։
Հիշեցնենք, որ Հռոմի ստատուտի վավերացումը լուրջ տարաձայնություններ էր առաջացրել Երևանի և Մոսկվայի միջև։ Ռուսաստանը դժգոհություն էր հայտնել Հայաստանի այդ քայլի կապակցությամբ՝ հաշվի առնելով Միջազգային քրեական դատարանի՝ ՌԴ նախագահ Վլադիմիր Պուտինին ձերբակալելու օրդերը։ Այդ ֆոնին հայաստանյան պաշտոնյաների հայտարարությունները ևս դարձել էին քաղաքական քննարկումների առարկա։
Սակայն փոխադարձ սահմանափակումների պատմությունը միայն այս ուղղությամբ չէ։ Հայաստանի Հանրապետությունն էլ իր հերթին արգելել է Ռուսաստանի որոշ ներկայացուցիչների մուտքը երկիր։ Մասնավորապես, Հայաստան մուտք գործելու արգելքի մասին հայտնի է դարձել ՌԴ Պետդումայի պատգամավոր Կոնստանտին Զատուլինի և մեդիագործիչ Մարգարիտա Սիմոնյանի դեպքում։
Այսպիսով, երկու երկրների միջև քաղաքական հակասություններն արտահայտվում են նաև կոնկրետ անձանց նկատմամբ կիրառվող մուտքի սահմանափակումներով։ Մի կողմից՝ Ռուսաստանը, մեր տեղեկություններով, արգելքներ է կիրառում Հռոմի ստատուտի շուրջ կոշտ դիրքորոշում արտահայտած հայաստանցի գործիչների նկատմամբ, մյուս կողմից՝ Հայաստանը ևս անցանկալի անձանց շարքում է ներառել ռուսաստանցի որոշ ներկայացուցիչների։
Իսկ ո՞րն է այս ամենի քաղաքական նպատակը։ Արդյոք խոսքը դիվանագիտական ազդակների, փոխադարձ ճնշումների՞, թե՞ երկու երկրների միջև խորացող անվստահության մասին է։
Լուսինե Բադալյանի դեպքը ևս մեկ անգամ օրակարգ է բերում հարցը՝ որքանո՞վ են հայ-ռուսական հարաբերություններում քաղաքական տարաձայնություններն ազդում պաշտոնյաների և պատգամավորների ազատ տեղաշարժի վրա։ Եվ արդյոք հայկական կողմը պատրաստվում է պաշտոնական պարզաբանում պահանջել Մոսկվայից՝ հասկանալու համար, թե ինչ հիմքով է Հայաստանի իշխող ուժի ներկայացուցչի մուտքը Ռուսաստան արգելվել»,- գրել է օրաթերթը։
