Գործընկերային հարաբերություններ ՌԴ-ի, Վրաստանի հետ կա՛մ չկան, կա՛մ խնդիրներն արագ չեն լուծվում. Գառնիկ Դանիելյան
- Lilit
- Oct 16
- 1 min read
«Հայաստան» խմբակցության պատագամավոր Գառնիկ Դանիելյանը միացել էր կառավարության առջև ցույցի դուրս եկած բեռնատարների վարորդներին։
Լրագրողների հետ զրույցում պատգամավորն ասաց, որ հարցը պետք է պատշաճ լուծման արժանանա, որովհետև դրանից է կախված ՀՀ տնտեսության և անվտանգային վիճակը։
«Իմ տվյալներով՝ շուրջ 400-ից ավելի բեռնատարի վարորդներ բախվել են այս խնդրին, ավարտվել է ՌԴ մուտք գործելու ժամկետը։ Կարելի էր չէ՞ այնպես անել, որ նախապես հարցը լուծվեր։ Մի երկրում ենք ապրում, որ արագ և մոբիլ գործընկերային հարաբերությունները կա՛մ չկան, կա՛մ արագ չեն լուծվում»,-ասաց նա և օրինակ բերեց ամիսներով չլուծվող կոնյակի արտահանման խնդիրը՝ Վրաստանի հետ, ծաղկի արտահանման խնդիրը՝ ՌԴ-ի հետ։
«Միշտ փափուկ ուժի քաղաքականությունը կա, տարբեր երկրներ կիրառում են իրենց բողոքը կամ հարաբերությունների վատթարացումն ինչ-որ մի ձև արտահայտելու, ազդելու վրա։ Հիմա կոնկրետ խնդիրը կա, առաջին հերթին պետք է զանգեին իրենց գործընկերներին։ Ասում են, որ կապեր ունենք, որ ռազմավարական գործընկեր ենք, որևէ խնդիր չունենք Վրաստանի հետ, նույնը՝ ՌԴ-ի հետ, բայց առաջանում է։ Եթե գործընկերային նորմալ հարաբերություններ են լինում, այդ խնդիրներն արագ կարգավորում են։ Նախկինում էլ խնդիրներ եղել են, բայց համապատասխան մարմինների հետ արագ, օպերատիվ աշխատանք է տարվել, որ խնդիրը լուծվի»,-ասաց նա։
