Հակասանիտարական վիճակ՝ Երևանում. կեղտաջրերը լցվում են ՀՀ նախագահի ավտոապարկ. գարշահոտը զգացվում է մի քանի 100 մետրից
- Lilit
- 3 days ago
- 2 min read
Արդեն մի քանի օր է՝ ահազանգեր ենք ստանում Երևանի Կենտրոն վարչական շրջանի Լեռ Կամսար փողոցի բնակիչներից, ովքեր արդարացիորեն իրենց զայրույթն են հայտնում Երևանի քաղաքապետարանի և «Վեոլիա ջուր» ընկերության նկատմամբ, հաղորդում է Shamshyan.com-ը:
Կայքի հետ զրույցում բնակիչներն ասում էին. «1 տարուց ավելի է՝ էս փողոցը, որը գտնվում է մայրաքաղաքի կենտրոնական հատվածներից մեկում, տիրում է գարշահոտություն և հակասանիտարական վիճակ:
1 տարի է՝ էլ «Վեոլիա ջուր», էլ Երևանի քաղաքապետարան ենք դիմել, սակայն մեկը մյուսի վրա է գցում, փոխարենը որպես բնակիչներ ու սպառողներ կանոնավոր վճարումները կատարում ենք, բայց դրա դիմաց ստանում ենք 0 սպասարկում, ու դրա պատասխանատուն ով է՝ չգիտենք, ասես կարմիր մոլորակում լինենք: Մի քանի դիտահորեր կան, որոնց տակով կոյուղատարերն են անցնում, բայց դրանք գործել են դեռ սովետական տարիներից, ու հիմա, ինչպես ժողովուրդն է ասում՝ իր դարն ապրել է: Պետք է հիմնովին փոխվի, նույնիսկ տրամագիծը պետք է մի քիչ մեծ լինի, որ երբևէ խցանում չառաջանա, իսկ անձրևային օրերին էլ էս տարածքում պիտի նավակով շրջես:
Դիտահորերից թափվող կեղտաջրերը հասնում են մինչև անգամ ՀՀ նախագահի ավտոտնտեսություն ու չգիտես ինչի՝ Հանրապետության նախագահին էլ գուցե չի մտահոգում էս հակասանիտարական վիճակը:
Նախագահական ապարատից մի հատ զանգ՝ Երևանի քաղաքապետ Տիգրան Ավինյանին՝ խնդիրը գիշերով էլ լուծել կտա քաղաքապետը, կպարտավորեցնի «Վեոլիա ջրին», որ թերությունը հրատապ ծրագրով լուծեն, մինչդեռ էդ կեղտաջրերը լցվում են նաև բարձրահարկ շենքի նկուղներ ու ավտոկայանատեղիներ (պարկովկաներ) ու դրա արդյունքում շենքի հիմքի հերը անիծվում է: Շենքը մի քանի տարում կդառնա վթարահին, պատկան մարմինները լավ էլ գիտեն՝ ով է սրա ավիրելու հեղինակը. հարևանությամբ կառուցվող նոր բարձրահարկ շենքի կառուցապատողն է, ով վերամբարձ կռունկը նաև այն հատվածում է կայանել, որ դրա տակով անցնող ջրահեռացման խողովակների հերը անիծել են: Մի քանի օր առաջ էլ դիմեցինք Երևանի քաղաքապետարան, մի անհեթեթ պատասխան են տվել»:
Հարգելի քաղաքացի, տեղեկացնում ենք Ձեզ, որ Լեռ Կամսար փողոցի համար կոմունալ տնտեսության վարչության կողմից գնման ընթացակարգով պատվիրվել են ջրահեռացման համակարգի կառուցման նախագծանախահաշվարկային փաստաթղթեր:
Միաժամանակ տեղեկացնում ենք, որ հետագայում ֆինանսական միջոցների առկայության դեպքում կիրականացվեն ջրահեռացման համակարգի կառուցման աշխատանքները: