Սարսափելի վթար ՌԴ Կրասնոդարի երկրամասում. 5 մարդ է զոհվել
- Octopus Media
- Jan 28, 2024
- 1 min read
Ռուսաստանի Դաշնության Կրասնոդարի երկրամասում սարսափելի վթար է տեղի ունեցել. «Մոսկվա-Նալչիկ» մարդատար ավտոբուսը Պավլովի շրջանի P 217 մայրուղու վրա վթարի է ենթարկվել, ինչի հետևանքով զոհվել է 5 մարդ, հայտնում է 360tv.ru-ն՝ վկայակոչելով ՌԴ ԱԻՆ տարածաշրջանային գլխավոր վարչությանը։
Փրկարարները ՃՏՊ-ի մասին տեղեկություն են ստացել հունվարի 28-ի գիշերը։
Հայտնի է, որ «Neoplan» ավտոբուսը ճանապարհի 15-րդ կիլոմետրին՝ Նովոուլեշկովսկայա կայարանի մոտ, բախվել է «Hyundai» բեռնատարին։
Հինգ մարդ զոհվել է, ևս ութը՝ վիրավորվել։ Բոլոր վիրավորները հոսպիտալացվել են։
Կրասնոդարի երկրամասի ներքին գործերի նախարարության գլխավոր վարչության տվյալներով, վթարի պահին ավտոբուսում եղել է 15 ուղևոր և երկու վարորդ։
Նախնական տվյալներով, վարորդը քնել է ղեկին և դուրս եկել հանդիպակաց գոտի, որտեղ էլ տեղի է ունեցել բախումը։ Ավտոբուսի վարորդն ու երկու ուղևորները, ինչպես նաև բեռնատարի ուղևորն ու վարորդը զոհվել են։
Վթարի վայր է ժամանել փրկարարական ջոկատը։ Վթարի հետևանքների վերացմանը մասնակցել է 27 մարդ և 11 հատուկ մեքենա։ Վթարի վայրում երթևեկությունը մասամբ արգելափակվել է։
