Մարուքյան. Ի տարբերություն Ադրբեջանի՝ Հայաստանն ԱՄՆ փոխնախագահի այցից նոր ոչինչ չի ստանա
- Lilit
- 2 hours ago
- 1 min read
ԱՄՆ նախագահ Դոնալդ Թրամփը հայտարարել է, որ ԱՄՆ փոխնախագահ Ջեյ Դի Վենսի՝ տարածաշրջան կատարելիք այցի շրջանակում Հայաստանի հետ կստորագրվի խաղաղ ատոմի ոլորտում համագործակցության համաձայնագիր։ Այս մասին նշել է «Լուսավոր Հայաստան» կուսակցության նախագահ Էդմոն Մարուքյանը։
«Այս ոլորտում համագործակցության մասին արդեն իսկ նշվել էր նախկինում ստորագրված հուշագրում։ Նույնը վերաբերում է արհեստական բանականության ոլորտին։ Այսինքն՝ Վենսի այցի արդյունքում Հայաստանը նոր ոչինչ չի ստանում։
Իսկ ի՞նչ կստանա Ադրբեջանը։ Այն մեր օգնությամբ կհաղթահարի ռազմական համագործակցության ոլորտում նախկինում սահմանված պատժամիջոցները։
Հայաստանը վաղուց պետք է բարձրացներ ցմահ դատապարտված հայ գերիների հարցը, մինչդեռ այդ մասին ոչ մի հայտարարություն չի արվել, նույնիսկ՝ մտահոգության մակարդակով։ Ընդ որում, այդ «դատավարության» ժամանակ վերջին 30 տարվա համար դատել են Հայաստանին, և դրա հիման վրա Ադրբեջանը վաղը փոխհատուցում կպահանջի, այդ թվում՝ տարածքների տեսքով։
Բացի այդ, Հայաստանը պետք է անվտանգության երաշխիքներ պահանջի, որ այն ռազմական տեխնիկան, որն Ադրբեջանը կստանա Հայաստանի օգնությամբ, չի օգտագործվի Հայաստանի դեմ՝ հաշվի առնելով Սյունիքի, Գեղարքունիքի և Վայոց Ձորի նկատմամբ Ադրբեջանի տարածքային հավակնությունները։
Նման պայմաններում կա՛մ պետք է այդ զենքը Հայաստանի դեմ չկիրառելու երաշխիքներ ստանալ, կա՛մ ԱՄՆ-ն պետք է զինի նաև մեզ, որպեսզի հավասարակշռություն լինի։
Բացի այդ, Վենսի այցի ընթացքում ԱՄՆ-ն կհստակեցնի նաև Երևանի ու Բաքվի դիրքորոշումներն իրանական հարցում։ Երկարաժամկետ հեռանկարում Վաշինգտոնը նպատակ ունի տարածաշրջանում թուլացնել իր հակառակորդների՝ Ռուսաստանի և Իրանի ազդեցությունը»,- նշել է Մարուքյանը։
