Ցավում եմ Առուշ Առուշանյանի արածի համար. Իշխան Սաղաթելյան
«Հայաստան» խմբակցության պատգամավոր, ՀՅԴ ներկայացուցիչ Իշխան Սաղաթելյանն անկեղծորեն հիասթափված է Գորիսի համայնքապետ Առուշ Առուշանյանի գործողություններից։ Իր տեսակետը պատգամավորը հայտնել է լրագրողների հետ զրույցում։
Մեկնաբանելով այս իրավիճակը՝ Սաղաթելյանը հայտնել է, որ խիստ հիասթափված է և սկզբում չէր հավատում։ Պատգամավորի խոսքով՝ Առուշանյանի վարքագիծն անընդունելի է ու անհասկանալի՝ թե՛ քաղաքական, թե՛ այլ առումներով։
Սաղաթելյանը հավելել է, որ ՏԻՄ ընտրություններին ՀՅԴ-ն մասնակցում է մի շարք համայնքներում։ Պատգամավորի գնահատմամբ՝ ողջ Հայաստանում թեկնածուների նկատմամբ խայտառակ ճնշումներ են գործադրվում․ բոլոր ուժային կառույցներն ու վարչակազմերը հետապնդում են բոլոր նրանց, ովքեր մտադիր են մասնակցել ընտրություններին։
«ՀՅԴ անդամների վրա դա չի ազդում, մենք կոփված ենք, բայց մյուսները կարող են տեղի տալ․ Առուշանյանի օրինակը վկայում է, որ տեղի ունեցողը որևէ կապ չունի ժողովրդավարության և իրավունքի հետ»,- հավելել է Սաղաթելյանը։
«Եթե չլինեին այդ մեթոդները, չէին ստանա այն արդյունքը, ինչ ունեն»,- նկատել է Սաղաթելյանը։
