Ղազախստանում ևս հերքել են Փաշինյանին վերագրվող կեղծ հայտարարությունները
Ղազախստանի նախագահի առընթեր Ապատեղեկատվության դեմ պայքարի կենտրոնը հերքել է սոցիալական ցանցերում տարածվող՝ Հայաստանի վարչապետ Նիկոլ Փաշինյանին վերագրվող կեղծ հայտարարությունը Ղազախստանի վերաբերյալ։
Կենտրոնի փոխանցմամբ՝ ստուգումը ցույց է տվել, որ Փաշինյանը նման խոսքեր չի ասել։ Կեղծ տեղեկատվության հեղինակները փոփոխել են վարչապետի իրական խոսքերի առանձին հատվածներ և ավելացրել արտահայտություններ, որոնք նրա ելույթում չեն եղել։
Ղազախստանի իշխանությունները նշել են, որ նման մանիպուլյացիաները կարող են նպաստել բացասական տրամադրությունների ձևավորմանն ու Հայաստանի և Ղազախստանի ժողովուրդների միջև լարվածության արհեստական ստեղծմանը։ Կենտրոնը քաղաքացիներին կոչ է արել չտարածել չստուգված տեղեկություններ և ուշադրություն դարձնել հրապարակումների աղբյուրին, ամսաթվին ու համատեքստին։
Ավելի վաղ, «Արմենպրես»-ի հարցմանն ի պատասխան ՀՀ վարչապետի աշխատակազմի տեղեկատվության և հասարակայնության հետ կապերի վարչությունից այդ հայտարարությունները վարչապետին վերագրելը ևս կեղծիք և ապատեղեկատվություն էին համարել:
